“Тошкент” аэропортида VIP-йўловчилар учун янги зал реконструкциядан сўнг фойдаланишга топширилди
Тошкент. 22 апрел. ЎзТАГ – “Тошкент” халқаро аэропортида VIP-йўловчилар учун янги зал реконструкциядан сўнг фойдаланишга топширилди, деб хабар беради Ўзбек телеграф агентлиги (ЎзТАГ).
“Янги зал дизайнини ишлаб чиқишда энг янги меъморий тамойил ва технологиялар ҳисобга олинди. Бу ерда йўловчиларни рўйхатга олиш ва багаж билан шуғулланиш учун юқори стандартлардаги замонавий техник ва технологик ускуналар ўрнатилган”, - деб таъкидлашди авиакомпанияда.
Кенг ва барча шароитлар муҳайё бўлган 350 кв. метрлик залда 160 ўрин бўлиб, бу ерда ўйин ҳудуди ва душга эга она ва болалар хонаси, тиббиёт пункти, Dutyfree божларсиз савдо дўкони бор. Йўловчилар хизматида турли хил таом ва ичимликлардан иборат кафе-бар ишламоқда.
Барча зарур қулайикларга эга бўлган янги залнинг ишга туширилиши қўшимча хизматлардан фойдаланиш истагида бўлган йўловчилар сонининг ошиши ва мамлакат сайёҳлик салоҳиятининг ривожига ҳисса қўшади.
Қайд этиш зарурки, ҳозирда бизнес-тоифа йўловчиларининг учиб келиш залини капитал таъмирлаш ишлари олиб борилмоқда.
