Тошкент иккиламчи бозорида “Chevrolet Spark” автомобили қимматлашди

Тошкент. 1 май. ЎзТАГ - Тошкент иккиламчи бозорида “Chevrolet Spark” автомобили қимматлашди, деб хабар беради uz24.uz интернет нашри тегишли нархлар таҳлилига асосланган ҳолда.
Мисол учун, 2014 йилнинг 27 апрель ҳолатига келиб илгари ҳайдалган “Chevrolet Spark”ни бозорда 37-40 млн сўмга сотиб олиш мумкин. Айтайлик, 2012 йилда чиққан оқ рангли “Spark” автомобилини февралда 27,569 минг км юрган бўлишига қарамасдан 31,9 млн сўмга ҳарид қилиш мумкин бўлган бўлса, айни пайтда ушбу автомобилнинг баҳоси 41,3 млн сўмни ташкил қилади. Қизил рангли 2 минг км юрган машина эса февралда 37,7 млн сўмга таклиф этилгани ҳолда ҳозирда 38,35 млн сўмга баҳоланган.
Ва ниҳоят, 2013 йилда чиқарилган ва 10 минг км юрган темирранг “Spark”ни Сергели бозорида 40,415 млн сўмга олиш мумкин. Эслатиб ўтамизки, февралда “Spark” нархлари 30-35 млн сўм атрофида бўлган.
Қайд этиш керакки, GM Uzbekistan сайтида келтирилган нархлар жадвалига кўра, “Spark” автомобили автосалонларда 27 млн 937,4 минг сўмдан бошлаб нархланади.
Нашрнинг ёзишича, мақолани ёзишда daryo.uz сайтидаги автомобиль нархларидан фойдаланилган.