Тошкент метрополитенининг барча станцияларида интернет тармоғи ишга туширилди
Тошкент. 7 октябрь. ЎзТАГ – Тошкент метрополитенининг барча станцияларида интернет тармоғи ишга туширилди, дея хабар беради Ўзбек телеграф агентлиги (ЎзТАГ).
"7 октябрь куни пойтахт метрополитенидан фойдаланувчилари интернетга кириш имконига эга бўлдилар. Энди Тошкент метрополитенининг барча йўловчилари ижтимоий тармоқлардаги лентани томоша қилишлари, севимли мусиқаларини онлайн тинглашлари ва оммабоп мессенжерларда мулоқот қилишлари мумкин", - дейилади "Ўзбекистон темир йўллари" АЖ матбуот хизмати хабарида.
Қайд этилганидек, тизим икки турдаги киришни таъминлайди – пуллик ва бепул.
"Тармоққа бепул уланиш учун метрога тушишдан олдин «Metrotelecom Free» тармоғини танлашингиз, телефон рақамингиз орқали киришингиз, реклама видеосини кўришингиз, интернетга кириш учун рухсат олишингиз керак", - дейилади хабарда.
Тармоққа уланиш бўйича кўрсатмалар, шунингдек, метрога тушишдан олдин жойлашган махсус ахборот жадвалларида ҳам кўрсатилади.
Ушбу лойиҳа «Metrotelecom» компанияси ва «Sola» Wi-Fi-операторлари ҳамда "Тошкент метрополитени" УК томонидан амалга оширилди.
Сурат манбаи: ca-news.org
