Тошкент ҳокими транспортни техник кўрикдан ўтказиш муддатларини тасдиқлади

Тошкент. 14 март. ЎзТАГ. – Тошкент шаҳар ҳокими транспорт воситаларини мажбурий техник кўрикдан ўтказиш даврийлиги ва уни ўтказиш муддатларини тасдиқлади, дея хабар беради Ўзбек телеграф агентлиги (ЎзТАГ).
“Юридик шахсларга тегишли транспорт воситаларининг техник кўриги 1 мартдан 30 июнга қадар ўтказилади, жисмоний шахслар учун ушбу муддат 1 январдан 31 августга қадар қилиб белгиланган”- деб таъкидлади пойтахт маъмуриятидаги манба.
Тижорат мақсадларида йўловчиларни ташиш учун ишлатилаётган енгил автомобиллар, автобус, трамвай, юк автомобиллари йилига икки марта техник кўрикдан ўтишлари зарур бўлади. Биринчи марта 1 мартдан 30 июнгача, иккинчи марта 1 сентябрдан 31 октябргача.
Ишлаб чиқарилганига 5 йил бўлмаган транспот воситалари 2 йилда бир марта техник кўрикдан ўтадилар. Ишлаб чиқарилганига 5 йилдан ошган ва ишлаб чиқарилган вақти маълум бўлмаган автотранспорт воситалари эса йилига бир марта техник ўрикдан ўтадилар.