“Тошкент-Токио” авиарейсини қайта тиклаш масаласи кўриб чиқилмоқда

Тошкент. 1 апрель. ЎзТАГ – Ўзбекистон ва Япония “Тошкент-Токио” тўғридан-тўғри авиарейсини қайта тиклаш имкониятини кўриб чиқмоқдалар. Ушбу ва бошқа масалалар Ўзбекистон Ташқи иқтисодий алоқалар, инвестициялар ва савдо вазирлигида Япония Парламенти Маслаҳатчилар кенгаши депутати Кеко Накаяма билан бўлиб ўтган учрашувда кўриб чиқилди, дея хабар беради Ўзбек телеграф агентлиги (ЎзТАГ).
Вазирликдан хабар беришларича, учрашувда иккитомонлама муносабатларнинг жорий ҳолати ва ривожланиш истиқболлари муҳокама этилган. Айниқса, туристик алоқаларнинг ривожига катта аҳамият берилган. Бу масалалар орасида “Тошкент-Токио” тўғридан-тўғри авиарейсини қайта тиклаш ҳам бор.
Эслатиб ўтамизки, Кеко Накаяма 1999-2002 йилларда Япониянинг Ўзбекистон Республикасидаги элчиси бўлган.
Айни пайтда Ўзбекистонда япон капитали иштирокида тузилган 11 корхона ишламоқда. Улар савдо, машинасозлик ва металлни қайта ишлаш, енгил саноат ва хизматлар соҳаларида фаолият юритади. Мамлакатда 14 япон компаниясининг ваколатхонаси рўйхатга олинган.