Тошкент транспорти учун GPS-трекерлар етказиб берувчи компания аниқланди
Дата: 19:13, 14-07-2014.
Тошкент. 14 июл. ЎзТАГ – Ўзбекистон ҳукумати пойтахт транспорти учун 2,5 минг комплект Meitrack GPS-трекерларини етказиб бериш лойиҳасини тасдиқлади, дея хабар беради Gazeta.uz.
Ушбу трекерлар хитойнинг Meitrack Group компаниясининг Т1 моделидаги қурилмалардир.
Тошкентда яратилаётган жамоат транспортини узоқдан бошқариш тизими учун яна ушбу ширкатдан қўшимча 150 GPS-антенна ва яна шунча GSM-антенналар ҳам олиш режалаштирилмоқда.
Ўзбекистон Вазирлар Маҳкамаси 4 июлдаги қарори билан “Узпроммашимпекс” ташқи савдо компаниясига хитойлик компания билан тендер ўтказмасдан шартнома тузишга рухсат берди.
Олиб кирилаётган ускуналар божхона йиғимидан ташқари божхона божларидан озод қилинган.
GPS-мониторинг ва йўловчилар оқимларини бошқариш тизимлари мамлакат президенти ва Вазирлар Маҳкамасининг ўтган йил куздаги ушбу соҳага оид махсус қарорига мувофиқ ташкил этилмоқда, деб ёзади нашр.
