Тошкент туманларининг саноат ҳудудларидан бирида 250 атрофида тадбиркорлик субъектлари фаолият юритмоқда
Тошкент. 2 март. ЎзТАГ – Тошкентдаги энг йирик Яккасарой тумани кичик саноат ҳудудида 250 атрофида тадбиркорлик субъектлари фаолият юритмоқда, деб хабар беради Ўзбек телеграф агентлиги (ЎзТАГ).
Ушбу маълумотлар бугун 2мартда ОАВ вакиллари билан бўлган учрашувда келтирилди. Яккасарой тумани кичик саноат ҳудудини бошқариш дирекцияси раҳбари Рустам Нуралиевнинг сўзларига кўра, илк корхоналар бу ерда 2014 йил январда ишлай бошлаган. Ҳудуднинг ер майдони бугун 65 гектарга тенг.
“Ўтган икки йилда бу ерда 6 минг атрофида иш жойи яратилди, энг кўп иш ўринлари енгил саноат, кийим кечак тикиш ва пойафзалчилик, кимё, машинасозлик соҳаларида ташкил этилмоқда. Жами турли соҳаларга мансуб 8 йўналиш мавжуд”, - деб таъкидлади Р.Нуралиев.
Ҳудуддаги тадбиркорлик субъектлари орасида ҳам маҳаллий, ҳам хорижлик инвесторлар, жумладан, Хитой, Туркия ва Буюк Британия сармоядорлари ташкил этган корхоналар бор.
Эслатиб ўтамизки, кичик саноат ҳудудларидаги участкалар тадбиркорлик субъектларига 10 йилга ижарага берилади. Ушбу муддат олинган мажбуриятлар тўлиқ бажарилганда чўзилиши мумкин. Шартнома тузилган маъмурият тадбиркорлик субъектларига хужжатларни расмийлаштириш ва кредит олишда ёрдам беради.
