Тошкент вилоятида қуввати йилига 3 млн дона автомобиль шиналари ишлаб чиқаришга тенг бўлган завод фойдаланишга топширилади

Тошкент. 5 сентябр. ЎзТАГ – Тошкент вилоятининг “Ангрен” ЭИҲда қурилаётган резинотехника буюмлар заводида йилига 3 млн дона автомобиль шиналари, 10 минг метр конвейер ленталари ҳамда қишлоқ хўжалиги техникаси учун 200 минг дона шиналар ишлаб чиқарилади, деб хабар беради Ўзбек телеграф агентлиги (ЎзТАГ).

Бу эса ўз навбатида республикага $200 млн миқдорида импорт орқали олиб келинадиган резинотехника буюмлари ҳажми кескин қисқаришига олиб келади.

Яқинда заводда автомобиль шиналарининг биринчи тажриба партияси ишлаб чиқарилди.

РТЗни барпо этиш жараёни бугунги кунга келиб якуний босқичга кириб, жиҳоз-ускуналар монтажи ҳамда уларни созлаш ва ишга тушириш ишлари жадал суръатлар билан олиб борилмоқда. Бу ишлар ноябр ойида якунланади.

Эслатиб ўтамизки, 2015 йилнинг 28 августида конвейер ленталар, автомобиль ва қишлоқ хўжалик техникаси учун шиналар ишлаб чиқаришни ташкил қилиш лойиҳасининг қурилиш ишлари бошланиши муносабати билан тантанали маросим ўтказилган эди. Қурилаётган корхона таъсисчилари “Ўзкимёсаноат” АЖ (50%), “Ўзавтосаноат” (30%), “Навоий ТМК” ДК (10%) ҳамда “Олмалиқ КМК” АЖларидир (10%).