Тошкентда ер усти халқа метро линияси қурилиши бошланди
Тошкент. 30 октябр. ЎзТАГ – Тошкентда ер усти халқа метро линияси қурилиши лойиҳасини амалга ошириш бошланди, деб хабар беради Ўзбек телеграф агентлиги (ЎзТАГ).
2017-2021 йилларга мўлжалланган лойиҳа беш босқичда амалга оширилади. Дастлабки босқичда Тошкент метрополитенининг "Дўстлик" бекатидан Қўйлиқ бозоригача бўлган қисми қурилади. Узунлиги 11 километр бўлган ушбу қисмда саккизта бекат бунёд этилиши мўлжалланмоқда.
“Иккинчи босқич Қўйлиқ бозори билан "Олмазор" бекатини боғлайди. Учинчи босқичда "Олмазор"дан "Беруний" бекатигача бўлган қисм барпо этилади. Кейинги босқичда иншоот "Беруний"дан "Бодомзор" бекатигача қурилади, сўнгги босқичда "Дўстлик" бекатига уланади”, - деб таъкидлашди давлат раҳбарининг матбуот хизматида.
Айни пайтда эстакадалар учун монолит усулда бетон устунлар қуйиш ишлари бошланди. Қурилиш “Ўзбекистон темир йўллари” акциядорлик жамиятига қарашли “Кўприк қурилиш трести” унитар корхонаси бунёдкорлари томонидан амалга оширилмоқда.
Мазкур метро йўналишининг умумий узунлиги 52,1 километрни ташкил қилади, унинг катта қисми баландлиги 6 метрлик эстакадалар орқали ўтказилади.
