Тошкентда илк маротаба “Expo – Russia Uzbekistan” кўргазмаси ўтказилади
Тошкент. 17 апрел. ЎзТАГ – 25-27 апрел кунлари Тошкентда илк маротаба “Expo – Russia Uzbekistan” биринчи халқаро саноат ярмаркаси бўлиб ўтади, деб хабар беради Ўзбек телеграф агентлиги (ЎзТАГ).
Ушбу маълумотни Киров вилояти ҳукуматининг матбуот маркази маълум қилди. Шунингдек, матбуот маркази Киров корхоналари ва ташкилотларини кўргазмада иштирок этишга таклиф қилмоқда.
Кўргазма “Фаол тадбиркорлик ва инновацион ғоялар ва технологияларни қўллаб-қувватлаш йили”га бағишланган.
“Expo – Russia Uzbekistan 2018”да Россия, Ўзбекистон, шунингдек, қатор Марказий Осиё мамлакатлари йирик, ўрта ва кичик бизнес вакиллари иштирок этадилар.
Кўргазмада энергетика ва энергия тежовчи технологиялар, машинасозлик ва металлургия, авиация ва темир йўл транспорти, қишлоқ хўжалиги, нефть ва газ саноати, шунингдек, банк, телекоммуникация, тиббиёт, таълим, хизматлар соҳаларидаги юқори технологиялар ва инновацион тармоқлардаги энг сўнгги ишланмалар тақдим этилади.
Кўргазма доирасида “Россия ва Ўзбекистон ўртасида инновация соҳасидаги ҳамкорлик, шу жумладан, “рақамли иқтисодиёт”дан фойдаланиш” мавзусида конференция, икки мамлакат ўртасидаги ҳамкорликнинг асосий йўналишлари бўйича давра суҳбатлари, ишбилармон доиралар вакиллари билан учрашувлар бўлиб ўтади.
Сурат манбаи: http://www.sppkk.ru/v-aprele-2018-goda-v-uzbekistane-projdjot-pervaja-mezhdunarodnaja-promyshlennaja-vystavka/
