Тошкентда илк марта DigiGirlz дастури ўтказилди
Тошкент. 11 апрел. ЎзТАГ – 10 апрель куни Microsoft компанияси маҳаллий компанияларнинг қўллаб-қувватлаши ёрдамида Ўзбекистонда биринчи маротаба қизлар салоҳиятини ошириш ва уларни технологиялар соҳасига жалб этишга қаратилган DigiGirlz таълим дастурини ўтказди, деб хабар беради Ўзбек телеграф агентлиги (ЎзТАГ) Тошкентдаги Инха университети матбуот хизматига таянган ҳолда.
Ташкилотчиларнинг маълумотларига кўра, тадбир 12 ёшдан 17 ёшгача бўлган 60 нафар қизлар қатнашди. Дастур ёш қизларга технология соҳаси ва янги инновациялар билан танишиш имконини берди.
DigiGirlz дастурининг биринчи ярмида Microsoftнинг таълим ечимлари бўйича мутахассиси Теодора Варбанова ахборот технологиялари ривожланишида қизлар ва аёлларнинг ўрни ҳақида сўзлаб берди. Ўзбекистонлик мутахассис Муқаддам Аҳмедова АТ-лойиҳани амалга оширишда ўз тажрибаси билан ўртоқлашди. Маъруза давомида олинган билимлар қизларга нимани кутиш мумкинлигини ва бу соҳадаги иш қандай натижа бериши мумкинлигини тушунишга, шунингдек, ахборот технологиялари соҳасида малака ошириш имкониятларини муҳокама қилишга имкон беради.
Иккинчи қисмда DigiGirlz дастурининг иштирокчилари амалий машғулотларда иштирок этишди. Ёш гуруҳнинг иштирокчилари (12 ёшдан 14 ёшгача бўлган қизлар) Flappy Bird ўйинини бошқариш учун сенсор яратишди. Катта гуруҳ (15-17 ёш)даги қизлар робот қўлини яратишда иштирок этишди. Ушбу девайсларни яратиш учун қизлар картон, сим, Adruino комплекти ва бошқа материалларни, шунингдек, дастурлаш бўйича билимларини ишлатишлари керак эди.
Эслатиб ўтамизки, DigiGirlz – Microsoft корпорациясининг қизчалар учун илм-фан, технология, муҳандислик иши ва математика соҳаларида таълимга инвестиция дастуридир. Дастур глобал иқтисодиётнинг чақируви ва муаммоларига тайёр бўлган келажак ходимларини тайёрлаш учун мўлжалланган.
Сурат манбаи: https://www.pinterest.co.uk/pin/149885493822488284/
