Тошкентда илк марта ICTFORUM ўтказилади
Тошкент. 24 август. ЎзТАГ – ICTWEEK Uzbekistan ахборот-коммуникация технологиялари доирасида Тошкентда илк марта ICTFORUM ўтказилади, деб хабар беради Ўзбек телеграф агентлиги (ЎзТАГ).
Бунга доир маълумот тадбир сайтида жойлаштирилган.
ICTFORUM-2015 тадбири 15-17 сентябр кунлари, АКТ Ҳафталиги эса 14-18 сентябрда Тошкентда, 15-16 сентябрда Самарқандда бўлиб ўтади.
“ICTFORUM илк марта ICTWEEK Uzbekistan ҳафталиги доирасида ўтказилмоқда. 2015 йилда ICTFORUM алоҳида конференциялар, секцион йиғилишлар, маҳорат дарслари мунозаралар шаклида бўлиб ўтади”, - дейилади хабарда.
Шунингдек, ICTFORUM дастурига ёшлар ва катталарни жалб қилиш учун турли интерактив тадбирлар киритилган.
Бундан ташқари, форум дастурий қўмитаси аъзолари тадбирдаги энг қизиқарли маърузаларни танлаб оладилар.
Эслатиб ўтамизки, ICTWEEK Uzbekistan 2015 ахборот-коммуникация технологиялари ҳафталиги АКТ соҳасидаги мамлакатдаги етакчи тадбир бўлиб, унинг доирасида саммит, форум, кўргазма ва конференциялар, мукофот ва тақдимотлар бўлиб ўтади. Тадбирда кўплаб учрашувлар, тажриба алмашишлар, янги технология ва инновациялар намойиш этилади.
