Тошкентда ипакчилик бўйича йирик халқаро конференция бўлиб ўтмоқда

Тошкент. 24 октябр. ЎзТАГ – Тошкентда ипакчилик ривожига бағишланган йирик халқаро конференция очилди, деб хабар беради Ўзбек телеграф агентлиги (ЎзТАГ).

Тадбирдан кўзланган асосий мақсад – ипак қурти ва тут кўчатлари генетик сифатини ошириш, улар селекцияси муаммоларига комплекс ёндашувни ишлаб чиқиш учун илмий жамоалар ва ипак етиштирувчилар орасида яқиндан алоқалар ўрнатиш, пиллани қайта ишлаш жараёнини чуқурлаштириш ва чиқиндисиз маҳсулот ишлаб чиқаришни йўлга қўйиш, янги турдаги маҳсулотларни яратишдан иборат.

“Конференция ишида Япония, Ҳиндистон, Озарбайжон, Хитойлик мутахассислар, шунингдек, тўқимачилик ва ипак саноати, учун технологик ускуналар ишлаб чиқариш бўйича дунёнинг етакчи компаниялари вакиллари, тегишли вазирлик ва идоралар мутахассислари, илмий-тадқиқот муассасалари олим ва профессорлари, Ўзбекистонда аккредитациядан ўтган дипломатик корпус ва халқаро ташкилотларнинг вакиллари иштирок этишмоқда”, – деб таъкидланади “Ўзбекипаксаноат” хабарида.

Ушбу тадбир доирасида ипакдан миллий либослар намойиши ва Ипакчилик бўйича илмий-тадқиқот институтининг 90 йиллиги муносабати билан концерт дастури ва тантанали қабул маросими бўлиб ўтади.

“Ўзбекипаксаноат” мутахассисларининг фикрига кўра, бундай тадбирлар чет эллик инвесторларни 3000 йиллик тарихга эга Ўзбекистон ипакчилиги салоҳияти билан таништиришга, ўзбек ипак маҳсулотларини янада оммалаштиришга, тармоқнинг экспорт салоҳиятини намойиш қилишга, дизайн компаниялари билан ҳамкорлик ўрнатишга хизмат қилади.