Тошкентда Ислом Каримовга ёдгорлик вариантлари кўргазмаси очилди

Тошкент. 4 апрел. ЎзТАГ – Ўзбекистон Бадиий академиясининг Марказий кўргазма залида Ўзбекистоннинг биринчи президенти Ислом Каримовга қўйиладиган энг яхши ҳайкал лойиҳаси бўйича эълон қилинган Халқаро танловга тақдим этилган ишлар кўргазмаси очилди, деб хабар беради Ўзбек телеграф агентлиги (ЎзТАГ).

Танловда Германия, Италия, Австрия, Украина, Жанубий Корея, Туркманистон, Австралия ва Ўзбекистондан тақдим қилинган 68та ҳайкаллар лойиҳалари қатнашмоқда.

“Барча лойиҳалар рақамланган, танлов шартига мувофиқ, жюри одилона ҳукм чиқариши учун муаллиф ҳайкалтарошларнинг номлари маълум қилинмайди”, - деб таъкидлашди мамлакат Бадиий академияси матбуот хизматида.

Кўргазма 15 апрелгача давом этади. Шудан кейин жюри аъзолари тақдим этилган барча асарларни 10 баллик тизим бўйича баҳолаб, танловнинг энг кўп балл олган уч ғолибини аниқлайди.

Эслатиб ўтамизки, конкурсда биринчи ўрин учун $25 минг, иккинчи ўринга $20 минг ва учинчи ўринга $15 минг мукофот берилади.