Тошкентда калава ишлаб чиқариш бўйича яна бир замонавий фабрика яратилди

Тошкент. 17 июл. ЎзТАГ – Ўзбекистон пойтахтида объектларни хатловдан ўтказиш натижасида Тошкентнинг Бектемир туманида 41,9 млрд сўм инвестиция жалб қилиш рқали калава ишлаб чиқариш бўйича замонавий фабрика яратилди, деб хабар беради Ўзбек телеграф агентлиги (ЎзТАГ).

Инвестициялар давлат қўмитасидан маълум қилишларича, натижада 296 та янги иш ўринлари яратилди. Корхона Textilservissolution МЧЖ сармоялари асосида фойдаланилмаётган объект негизида ташкил қилинди.

Ўтказилган хатловлар натижасида, шу кунга қадар Тошкент шаҳрида жами 221 та бўш турган ва қурилиши тугалланмаган объектлар аниқланиб, мулкдорлар билан биргаликда улардан 141 таси бўйича инвестиция лойиҳалар ишлаб чиқилган.

2018 йилнинг бошидан Тошкент шаҳрида 22 та илгари хусусийлаштирилган, бўш турган корхоналарда 90,8 млрд сўм миқдоридаги инвестиция лойиҳалари амалга оширилиб, 681 та янги иш ўринлари яратилди.

Эслатиб ўтамизки, Ўзбекистон Республикаси Президентининг 2017 йил 23 февралдаги ПҚ-2796-сонли қарори ижроси доирасида бўш турган ишлаб чиқариш майдонлари ва қурилиши тугалланмаган объектлардан самарали фойдаланишни таъминламаган мулкдорларга тегишли солиқ чоралари қўлланади.

 

Сурат манбаи: https://uz.all.biz/stanki-pryadilnye-bgg1040561