Тошкентда хакерлар учун Ўзбекистондаги биринчи турнирнинг яримфинали бўлиб ўтди
Тошкент. 11 июл. ЎзТАГ – 7-9 июл кунлари Тошкентдаги Ёшлар ижодиёти саройида Cyber Security Challenge Uzbekistan конкурсининг яримфинали бўлиб ўтди, деб хабар беради Ўзбек телеграф агентлиги (ЎзТАГ).
Яримфиналчиларни асосий танлов йўналишлари бўлган стеганография, криптография, веб-нозикликлар, операцион тизимлардаги бўш нуқталар, шунингдек, дастурий таъминотлардаги нозик жиҳатлар каби 16 вазифадан иборат кибер-квест кутаётган эди.
“Тақдим этилган 16 вазифадан биттасини иштирокчиларнинг ҳеч бири ишлай олмади. У олдиндан вирус билан зарарлантирилган дастурий таъминотга йўл топиш бўйича эди. Вазифанинг калити иштирокчиларга максимал 600 балл берар эди, аммо уни ҳеч ким бажара олмади. Турнир жадвалининг биринчи ўрнини 15 вазифани ечган иштирокчи 4160 балл билан эгаллади. Солиштириш учун, кибер-квест яримфиналчиларининг ўртача баллари 2000га тенг”, – деб таъкидлашди турнир ташкилотчилари.
Натижада финалга жами 219 қатнашчиларнинг фақат 95таси ўтишди. Финалчилар сентябрда бўлиб ўтадиган ICTWEEK Uzbekistan-2016 ҳафталиги доирасидаги ҳал қилувчи СTF-турнирига таклиф этиладилар. Уч ғолиб конкурснинг 30 млн сўмлик соврин жамғармасини бўлиб олади.
Эслатиб ўтамизки, Cyber Security Challenge Uzbekistan танлови киберхавфсизлик бўйича мамлакатдаги илк очиқ мусобақадир. Конкурс ахборот технологиялари соҳасига қизиққан ёшларнинг интеллектуал салоҳиятини оширишга қаратилган. Конкурсда 15дан 30 ёшда бўлган ёш виртуал инфраструктура мутахассислари қатнашишлари мумкин.
