Тошкентда хитойнинг Шэньси провинцияси тадбиркорлари билан бизнес-форум бўлиб ўтди
Тошкент. 13 октябр. ЎзТАГ – Бугун Тошкентда Шэньси провинциясининг (ХХР) 26 компаниялари иштирокида ўзбек-хитой бизнес-форуми бўлиб ўтди, деб хабар беради Ўзбек телеграф агентлиги (ЎзТАГ).
Тадбир Ўзбекистон Савдо-саноат палатаси (ССП) ва Хитой Халқаро савдога кўмаклашиш қўмитаси (CCPIT) Шэньси провинцияси бўлими томонидан ташкил этилди.
ССП маълум қилишларича, текстиль, тикув, тиббий ва бошқа турдаги ускуналар, электротехника, муқобил энергия манбалари, дори ва дори воситалари, телекоммуникация ва АКТ, машинасозлик, қурилиш, фармацевтика, текстиль, кимё саноати ва бошқа йўналишлардаги компаниялар вакиллари делегация таркибига кирган.
Хитой делегацияси раҳбари, CCPIT раиси ўринбосари Ву Фу Джиенинг (Wu Fu Jie) сўзларига кўра, Шэньси Хитой ички томонидаги провинция бўлиб, майдони 205,8 минг кв км, аҳолиси 37,77 млн киши. Ҳудуднинг марказий шаҳри Сиань бўлиб, у “терракот армияси” ёдгорлиги билан бутун дунёга танилган.
Шэньси Хитойнинг ресурслар сони бўйича энг йирик провинциясидир. Бу ерда тошкўмир, нефть ва табиий газ қазиб олинади.
Шэньсида механика саноати, авиакосмик саноат, текстиль, электроника, фармацевтика, энергетика, озиқ-овқат саноати яхши ривожланган. Ҳарбий саноат корхоналари бўйича Шэньси ХХР биринчи ўринни эгаллайди.
Эслатиб ўтамизки, кейинги 7 йилда Хитой ва Ўзбекистоннинг ўзаро товар айланмаси ҳажми 5 бараварга ўсди. Ўзбекистонда хитойлик тадбиркорлар билан биргаликда ташкил қилинган 482 корхона мавжуд, улардан 78 тўлик Хитой сармоясига очилган. Республикада 74 зиёд хитой компанияларининг ваколатхоналари мавжуд.
