Тошкентда кичик ҳалқа йўлининг бир қисми ёпилади
Тошкент. 21 август. ЎзТАГ – Тошкентда йўл ўтказгич қурилиши муносабати билан Кичик автомобиль ҳалқа йўлининг бир қисми ёпилади, деб хабар беради Ўзбек телеграф агентлиги (ЎзТАГ).
“Йўл 21-24 август кунилари Тошкент кичик автомобиль ҳалқа йўлининг Махтумқули кўчасидан (Эски ТошМИ) Амир Темир кўчасига (Шимолий вокзал) қадар бўлган қисми ёпилади”, - дейилади Тошкент ИИББ хабарида.
Янги автомобиль йўл ўтказгичи Кичик ҳалқа автомобиль йўлининг Шимолий вокзал ҳудудидаги Фарғона йўли кўчаси билан кесишмасида барпо этилаётган бўлиб, уни 1 сентябрга фойдаланишга топшириш режалаштирилмоқда.
Бу ерда олдин 2008 йилгача шаҳарнинг шарқий қисмини марказ билан боғлаб турувчи кўприк мавжуд эди. Кейинчалик кўприк хавфсизлик нуқтаи назаридан олиб ташланган эди. Кўприк рўпарасига турар-жой мавзуси тушгани муносабати билан янги йўл ўтказгич уни айланиб ўтади.
