Тошкентда квартираларга кадастр паспортлари бериш режалаштирилмоқда

Тошкент. 12 апрел. ЎзТАГ – 16 апрелдан бошлаб Тошкентда кадастр йиғмажилди ва эгалик ҳуқуқини тасдиқловчи ҳужжат ўрнига кадастр паспортини бериш бошланади, деб хабар беради Ўзбек телеграф агентлиги (ЎзТАГ).

У техник инвентаризация ўтказилганидан сўнг ва квартираларга эгалик ҳуқуқи давлат рўйхатидан ўтказилганидан кейин квартираларнинг эгалари аризаси асосида берилади.

Бу ҳақида 11 апрелда пойтахт Ер ресурслари ва давлат кадастри бошқармаси маълум қилди.

Кадастр паспортлари “Тошкент шаҳридаги кўпқаватли уйларда жойлашган квартираларнинг кадастр ҳужжатларини тайёрлашда жараёнларни соддалаштириш ва муддатларни қисқартириш, шунингдек, квартира билан боғлиқ операцияларда эгалик қилувчилар учун қулайлик яратиш мақсадида Ўзбекистон Республикаси Ер ресурслари ва давлат кадастри қўмитасининг 2018 йил 27 мартдаги 167-сони қарорига мувофиқ жорий этилмоқда”.

Квартиранинг кадастр паспорт белгиланган шаклдаги ҳимояланган бланк бўлиб, унда квартиранинг техник параметрлари, кадастр қиймати, квартира режаси, эгалик ва квартирага бўлган ҳуқуқнинг давлат рўйхатидан ўтгани ҳақидаги маълумот ўрин олади.

Шунингдек, кадастр паспортида QR-код мавжуд бўлиб, унинг ёрдамида онлайн режимда ҳужжат мақомини, унинг ҳақиқийлиги, квартирага нисбатан таъқиқлар мавжуд эмаслиги ва бошқа маълумотларни текшириш мумкин бўлади.

Ҳужжатнинг янги намунаси фақат квартираларнинг янги эгалари ёки эски кадастр ҳужжатларини йўқотган квартира эгасининг аризалари асосида берилади.

Аввал берилган кадастр ҳужжатларини янгилаш талаб қилинмайди ва улар квартира эгасининг унга бўлган ҳуқуқи бекор қилинмагунга қадар ҳақиқий ҳисобланади.

Сурат манбаи: http://darakchi.uz/ru/921