Тошкентда LTE стандарти бўйича форум бўлиб ўтади
Тошкент. 17 июн. ЎзТАГ - Huawei компанияси Тошкентда LTE стандарти бўйича форум ўтказади, деб хабар беради Ўзбек телеграф агентлиги (ЎзТАГ).
“Huawei LTE FORUM 2015” форуми LTE технологияси асосидаги кенгполосали мобиль интернетнинг истиқболларига бағишланган. Тадбир 21 июлда пойтахтдаги International меҳмонхонасининг конференц-залида бошланади. Форумда хорижий эксперт ва мутахассислар қатнашиб, 4G технологияси истиқболларига доир қарашлари билан ўртоқлашадилар”, – деб таъкидлади ЎзТАГ мухбиримизга Huaweiнинг Ўзбекистондаги ваколатхонасидаги манба.
Эслатиб ўтамизки, Huawei компанияси Ўзбекистонда 2000 йилдан бери фаолият юритади ва ўзбек алоқа операторларига LTE-ускуналар етказиб бериш бўйича етакчи ширкатлардан бири. Хусусан, яқинда ишга тушган Uzmobile GSM Ўзбекистон миллий мобиль оператори ҳам хитой компаниясининг ускуналари асосида ишлайди.
