Тошкентда муқобил энергетика бўйича хужжатли фильмнинг премьераси бўлиб ўтди

Тошкент. 10 декабр. ЎзТАГ – Тошкентда “Ўзбеккино” Миллий агентлиги буюртмаси бўйича “Fazo-video” студияси томонидан суратга олинган “Тоза энергия” номли хужжатли фильмнинг премьераси бўлиб ўтди, дея хабар беради Ўзбек телеграф агентлиги (ЎзТАГ).

“Ушбу фильм Ўзбекистонда қуёш энергиясидан фойдаланишнинг тарихи ва истиқболлари ҳақида ҳикоя қилади. Соҳанинг тарихи “Гелиотехника” журнали чиқа бошлаган ва Цельсий шкаласи бўйича 2000 даражага бардош берувчи қуёш печини қуриш ҳақида қарор қабул қилинган 70-йилларга бориб тақалади. Бугунда қуёш қувватини электр қувватига айлантиришга талаб ошиб бораётган бир пайтда бу бирламчи аҳамиятга эга”, – деб таъкидлади сценарий муаллифи Динора Азимова.

Картина режиссёр Маҳмуд Тўйчиев ва оператор Кахрамон Ҳасановлар томонидан суратга олинган.