Тошкентда немис иқтисодиёти куни бўлиб ўтади
Тошкент. 22 сентябр. ЎзТАГ – Жума, 23 сентябрда Тошкентда “Ўзбекистонда немис иқтисодиёти куни” бўлиб ўтади, деб хабар беради Ўзбек телеграф агентлиги (ЎзТАГ).
Хабар қилинишича, тадбирда Германия Иқтисодиёт ва энергетика федерал вазирлиги, Ўзбекистонда ишлаетган немис ширкатлари, шунингдек, Ўзбекистон вазирлик, муассаса ва тармоқ компаниялари вакиллари иштирок этадилар.
“Тадбирдан кўзланган мақсад – Ўзбекистон ва Германия корхоналари орасида алоқаларни йўлга қўйишга кўмаклашиш, тажрибали герман компанияларининг Ўзбекистонда бизнес юритиш бўйича тақдимотлари, шунингдек, янги инвестиция лойиҳаларини молиялаштириш имкониятларини ўрганиш кабилардир”, - деб таъкидлашди Германиянинг Ўзбекистондаги элчихонасида.
Ушбу тадбир доирасида ўзбек ва немис томонларининг инфраструктурани ривожлантириш, корпоратив бошқарув, муқобил энергетика, савдо, банк соҳаси бўйича ҳамкорликни ривожлантиришни йўлга қўйиш билан боғлиқ масалалар юзасидан чиқишлари, иккитомонлама музокаралар ҳам режалаштирилган.
