Тошкентда Россия куни нишонланди
Тошкент. 13 июн. ЎзТАГ – Россиянинг Тошкентдаги элчихонасида Россия куни муносабати билан қабул бўлиб ўтди, деб хабар беради Ўзбек телеграф агентлиги (ЎзТАГ).
Тадбирда Ўзбекистон бош вазири Абдулла Арипов, Олий Мажлис Сенати ва Қонунчилик палатаси, ТИВ, бошқа вазирликлар, жамоат ташкилотлари, дипломатик корпус, ижодий интеллигенция, ОАВ вакиллари меҳмон бўлдилар.
Россиянинг Ўзбекистондаги фавқулодда ва мухтор элчиси Владимир Тюрденев табрик сўзида Россия Федерацияси давлат мустақиллиги қабул қилинган чорак асрдан кўп вақт давомида мураккаб тарихий тўсиқлардан ўтиб, жаҳон саҳнасида муносиб ўринни эгаллаганини айтиб ўтди.
У Ўзбекистон Россия учун Марказий Осиёдаги асосий ҳамкорлардан бирилиги, жорий йилда мамлакатлар дипломатик муносабатлар ўрнатилганлигининг 25 йиллигини нишонлаётганини таъкидлаб ўтди.
“Давлатларимизда яшовчи халқларнинг дўстлик ришталарига асосланган Россия ва Ўзбекистон орасидаги яхши алоқалар катта истиқболга эга. Биз ўзаро фойдали ҳамкорликдан манфаатдормиз”, - деб таъкидлади россиялик дипломат.
Якунида Тюрденев барча йиғилганларни Россия куни билан табриклади ҳамда Россия ва Ўзбекистон халқларига тинчлик ва фаровонлик тилади.
