Тошкентда ШҲТ Минтақавий антитеррористик таркиби йиғилиши бўлиб ўтади

Тошкент. 18 сентябр. ЎзТАГ – Тошкентда Ўзбекистон раислигида Шанхай ҳамкорлик ташкилоти (ШҲТ) Минтақавий антитеррористик таркиби кенгашининг (МАТК) 27-йиғилиши бўлиб ўтади, деб хабар беради жума куни Қозоқ телеграф агентлиги (КазТАГ).

Йиғилиш иштирокчилари дунёдаги мавжуд хавфлар асносида терроризм, сепаратизм ва экстремизмга қарши туриш соҳасидаги фаолиятни кучайтириш чораларини муҳокама қиладилар.

Йиғилишда Қозоғистон, Хитой, Қирғизистон, Россия, Тожикистон, Ўзбекистон ва ШҲТ МАТК Ижроя қўмитаси вакиллари қатнашадилар. Қозоғистон делегациясига Тошкентдаги учрашувда Қозоғистон МХҚ раиси ўринбосари Ануар Садыкулов бошчилик қилади.

Хусусан, ШҲТ аъзо давлатлар чегара хизматлари экспертларининг 2016 йилги иш режаси муҳокама қилинади.

Бундан ташқари, йиғилиш қатнашчилари 16 сентябрда Қирғизистонда якунланган “Марказий Осиё – Антитеррор-2015” қўшма аксилтеррор ўқувларига баҳо берадилар.

Шунингдек, йиғилиш иштирокчилари, ШҲТ аъзо давлатларнинг терроризм, сепаратизм ва экстремизмга қарши туриш соҳасидаги ҳамкорлигининг ҳуқуқий асосларини ҳам кўриб чиқадилар.