Тошкентда сил билан курашишнинг замонавий услублари муҳокама қилинди

Тошкент. 9 август. ЎзТАГ – Тошкентда бўлиб ўтган учрашувда сил билан курашишнинг Ўзбекистонда қўлланаётган замонавий услублари муҳокама қилинди, деб хабар беради Ўзбек телеграф агентлиги (ЎзТАГ).

Учрашув  Ўзбекистон Республикаси Соғлиқни сақлаш вазирлиги, АҚШ Халқаро ҳамкорлик агентлиги (USAID) томонидан Республика фтизиатрия ва пульмонология ихтисослашган илмий-амалий маркази билан ҳамкорликда ташкил этилди.

Хусусан, “давра суҳбати” доирасида Навоий, Бухоро, Хоразм ва Қашқадарё вилоятларида сил билан оғриган беморларни даволашнинг янгича услублари муҳокама қилинди.

Натижада сил билан касалланган хасталарни, жумладан унинг дорига чидамли турлари билан оғриган беморларни амбулатор шароитларда даволаш бўйича тавсия ва чоралар ишлаб чиқилди. Улар Ўзбекистон Республикаси Соғлиқни сақлаш вазирлигининг Силни амбулатор даволаш бўйича буйруғига киритилади.

Эслатиб ўтамизки, USAID Ўзбекистон ҳукуматининг сил билан кураш бўйича ҳаракатларига қиймати $7,6 млнлик дастур ёрдамида кўмаклашмоқда.