Тошкентда Венгриянинг янги элчиси билан учрашув бўлиб ўтди

Тошкент. 8 июн. ЎзТАГ – Куни-кеча Ўзбекистон Республикаси Ташқи ишлар вазири Абдулазиз Камилов Венгриянинг янги тайинланган Фавқулодда ва Мухтор Элчиси (қароргоҳи Москва шаҳрида) Янош Баллани қабул қилди, деб хабар беради Ўзбек телеграф агентлиги (ЎзТАГ).

ТИВ маълумотига кўра, элчи Ўзбекистон Республикаси Президенти номига йўлланган ишонч ёрлиқларини топширган.

Қабулда бўлиб ўтган суҳбат чоғида турли соҳалардаги, жумладан Ўзбекистон – Европа Иттифоқи шаклидаги икки томонлама ҳамкорликнинг ҳолати ва уни ривожлантириш истиқболлари муҳокама қилинган.

Шунингдек, учрашувда томонлар ўзаро манфаат касб этадиган баъзи минтақавий ва халқаро масалалар юзасидан ҳам фикр алмашилди.

Эслатиб ўтамизки, 2012 йилда Ўзбекистон ва Венгрия дипломатик муносабатлар ўрнатилганлигининг 20-йиллигини нишонладилар.