Тошкентда янги телерадиоканал тақдим этилди
Тошкент. 15 июн. ЎзТАГ – Тошкентда кечаю-кундуз ишловчи O’zbekiston 24 янги ахборот-таҳлилий телерадиоканали тақдим этилди, деб хабар беради Ўзбек телеграф агентлиги (ЎзТАГ).
“Янги телерадиоканални ташкил этишдан бош мақсад – аҳолига ишончли ахборот етказиш, республика медиа майдонини сифатли ахборот-таҳлилий материаллар билан бойитишдан иборат. O’zbekiston 24 мамлакат ва хориждаги сиёсат, хавфсизлик, иқтисодиёт, фан, маданият соҳаларидаги муҳим воқеаларни тезкор ёритади”, - деб таъкидлади Ўзбекистон миллий телерадиокомпанияси раисининг биринчи ўринбосари Бобир Алихонов.
O‘zbekiston 24 Diyor телеканали базасида (Madaniyat va ma’rifat телеканали) ва Toshkent радиоканали (Toshkent телерадиоканали) базасида ташкил этилади, уларнинг частота ва штатлари янги каналга ўтади. O‘zbekiston 24да жами 251 киши ишлайди.
Таҳлилий салоҳиятни кучайтириш учун O‘zbekiston 24 таркибига O‘zbekiston телеканалининг Axborot дастури, Yoshlar телеканалининг Davr, Toshkent телеканалининг Poytaxt дастурлари берилади. Оперативликни таъминлаш учун телерадиоканалнинг 9 та хорижий давлатда мухбирлари иш юритади.
O‘zbekiston 24 SD ва HD форматларида рақамли эфир ижтимоий пакетига киритилади. Унинг HD форматидаги трансляцияси мамлакатда ушбу форматга тўлиқ ўтилгунига қадар параллел равишда UzHD каналида ҳам амалга оширилади.
