Тошкентда Яримпрофессионал бокс лигаси учрашувлари бўлиб ўтади

Тошкент. 22 феврал. ЎзТАГ – Тошкентда илк маротаба The World Series Boxing (WSB) Бутунжаҳон бокс жангларининг VI мавсуми жанглари бўлиб ўтади. “Uzbek Tigers” жамоаси аъзолари Яримпрофессионал бокс лигаси баҳсларида 26 ва 27 февралда ўз рақиблари билан беллашадилар, деб хабар беради Ўзбек телеграф агентлиги (ЎзТАГ).

Ўзбекистон Бокс федерациясидан хабар қилишларича, унга Халқаро ҳаваскор бокс уюшмаси (AIBA) шартномаси асосида учрашувлар уюштириш ҳуқуқи берилган.

26 февралда “Uzbek Tigers” “Puerto Rico Hurricanes” жамоаси билан, 27 февралда эса WSB чемпиони “Astana Arlans” жангчилари билан рингга чиқади.

Олдинги баҳсларда “Ўзбек йўлбарслари” “Puerto Rico Hurricanes” устидан 5:0 ҳисобида ғалаба қилиб, “Azerbaijan Baku Fires”га (2:3) енгилган эди. Ҳар икки учрашув сафарда ўтказилди.

Эслатиб ўтамизки, Яримпрофессионал бокс лигаси (The World Series Boxing – WSB) AIBAга бўйсинувчи ҳаваскор боксчилар уюшмасидир.

Анъанавий боксчилардан фарқли ўлароқ иштирокчилар жангларда ҳимоя шлемларисиз очиқ бадан билан иштирок этишлари зарур. Профессионал боксдаги каби пул ишлашга ҳам рухсат берилган. Шундай бўлсада, у ҳаваскорлик мақомига ва Олимпиада қатнашиш ҳуқуқига эга.

Профессионал боксдаги каби ҳар бир жанг уч ҳакам берган баллар асосида кўриб чиқилади.