Тошкентда йирик швед компаниялари иштирокида бизнес-форум бўлиб ўтади
Тошкент. 17 феврал. ЎзТАГ – 22 февралда Тошкентда Швециянинг йирик компаниялари иштирокида ўзбек-швед бизнес форуми ва кооперацион биржаси бўлиб ўтади, деб хабар беради Ўзбек телеграф агентлиги (ЎзТАГ).
Ўзбекистон савдо-саноат палатаси томонидан Business Sweden номли Швециянинг савдо ва инвестицион кенгаши билан ҳамкорликда Швециянинг Ўзбекистондаги элчиси (қароргоҳи Стокгольмда) Ингрид Терсман бошчилигида швед ишбилармонларининг Ўзбекистонга ташрифи ташкиллаштирилмоқда. Делегация таркибига тоғ-кон саноати, энергетика ва телекоммуникация соҳалари, шунингдек, транспорт ва инфратузилмани ривожлантириш бўйича иш юритадиган Швециянинг йирик компаниялари вакиллари киритилган.
ССП маълумотларига кўра, ушбу тадбирлардан кўзланган мақсад ўзбек ва швед ширкатлари ўртасида савдо алоқалари ўрнатиш, швед компанияларининг Ўзбекистонда бизнес юритиш тажрибасини тақдим этиш, янги қўшма корхоналар ва инвестиция лойиҳаларини амалга ошириш масалаларини кўриб чиқишдан иборат.
