Тошкентда юнон рум кураши бўйича ёшлар ўртасида халқаро турнир бўлиб ўтади

Тошкент. 13 январ. ЎзТАГ – 16-17 январда Тошкентда юнон рум кураши бўйича ёшлар ўртасида Хизмат кўрсатган спорт устаси ва Ўзбекистонда хизмат кўрсатган тренер Камил Фаткуллин совринига халқаро турнир бўлиб ўтади, деб хабар беради Ўзбек телеграф агентлиги (ЎзТАГ).

Спорт курашлари уюшмасидан маълум қилишларича, “Шарқнинг куч анъаналари” турнирида 2001-2002 йилларда туғилган ёшлар қатнашади.

Ўзбекистон жамоаси билан бирга турнирда Россия, Қозоғистон, Тожикистон ва Қирғизистон жамоалари ҳам иштирок этади.

Эслатиб ўтамизки, Камил Фаткуллин мамлакатнинг атоқли курашчиларидан биридир. У 1977, 1979 ва 1983 йиллардаги жаҳон биринчилиги кумуш совриндори ҳамда 1984 йилги Европа чемпиони.

К.Фаткуллин Ўзбекистон термасининг катта тренери бўлган даврда Дилшод Орипов 2001 йилда жаҳон чемпионатини ютиб олди, Александр Доктуришвили эса Олимпиада-2004нинг олтин медалини олди.

2015 йилда “классик”лар ўртасида мамлакат термасининг катта мураббийи ишига қайтган К.Фаткуллин Ўзбекистон спортчиларини 2016 йилги Олимпиаданинг лицензион турнирларига тайёрлашда давом этмоқда.