Тошкентда “Зарб” фильмининг премьераси бўлиб ўтади

Тошкент. 15 апрель. ЎзТАГ – 18 апрель куни Тошкентда саҳналаштирувчи режиссёр Нозим Тўлахўжаев томонидан суратга олинган “Зарб” тўламетражли фильмининг премьераси бўлиб ўтади, дея хабар беради Ўзбек телеграф агентлиги (ЎзТАГ).
Фильм “Ўзбеккино” Миллий агентлиги томонидан суратга олинган бўлиб, сценарий муаллифи Эльмира Ҳасановадир.
“Ўзбеккино” агентлигидан хабар беришларича, фильм истеъдодли ўзбек доирачисининг тақдири ҳақида ҳикоя қилади. У умри охирида бир неча яқин кишилари, шу жумладан, хотини ва дўстларининг ўзига хиёнат қилганлигини билиб қолади. Фақат ўз шогирди – истеъдодли ногирон болага бўлган меҳригина уни ҳалокатдан қутқариб қолади.
“Ўзбекфильм” киностудиясида суратга олинган янги кинофильмнинг премьераси тошкентнинг икки саҳнасида бўлиб ўтади. 18 апрелда бадиий фильм А. Навоий номидаги Санъат саройида ва кейинги куни “Ғунча” кинотеатрида илк маротаба кўрсатилади.