Тошкентда “Ўзбек халқининг келиб чиқиш тарихи” китоби тақдим этилди
Тошкент. 26 май. ЎзТАГ – Ўзбекистон Миллий кутубхонасида Аҳмадали Асқаровнинг “Ўзбек халқининг келиб чиқиш тарихи” китобининг тақдимоти ўтказилди, деб хабар беради Ўзбек телеграф агентлиги (ЎзТАГ).
Кутубхонадан хабар қилишларича, тадбирда китоб муаллифи, тарихчи профессорлар М.Исъҳоқов, А.Ашуров, фолклоршунос олим Т.Мирзаев, китоб ҳаммуаллифи, тарихий обидаларни таъмирлаш бўйча мутахассис Ш.Илҳомов ва бошқа тадқиқотчилар қатнашдилар.
“Бу китоб кўпйиллик меҳнат самрасидир ва ундаги барча маълумотлар илмий тадқиқ этилиб ўз исботини топган, - деди тарихчи М.Исъҳоқов. - Унинг ҳозирги кунда рус ва инглиз тилларига таржима қилинаётганлиги эса дунёда унга бўлган қизиқишнинг ортаётганлигидан дарак беради”.
Китобнинг Ўрта Осиё халқлари этник жараёнининг ўсишини ўрганишга қўшган хиссасига қаратар экан, фолклоршунос олим Т.Мирзаев йиғилганлар эътиборини А.Асқаровнинг этногенез тарихи ва этник маданият тараққиётига доир илмий тақдиқотларига қаратди.
Таъкидланишича, китоб муаллифи “ўзбек миллий менталитети” тушунчасини таърифлайди ва унинг ўзига хосликларини очиб беради. Китобда қисқартмалар, атамалар ва топонимларнинг илмий исботланган изоҳлари билан, бобларга ажратилган ҳолда берилиши алоҳида эътиборга лойиқ.
