Тошкентда ўзбек компанияларига хорижий бошқарувчиларни жалб қилиш масаласи муҳокама қилинди
Тошкент. 29 апрел. ЎзТАГ – Куни кеча Тошкентда хорижий бошқарувчиларни қидириш масаласига қандай қилиб самарали ёндашиш лозим деган саволларга жавоб излаган семинар-практикум бўлиб ўтди, деб хабар беради Ўзбек телеграф агентлиги (ЎзТАГ).
Семинар Ўзбекистон Давлат рақобат қўмитаси, республика Савдо-саноат палатаси ва Корпоратив бошқарув илмий-амалий маркази томонидан ташкил қилинди.
Тадбирда республикада замонавий корпоратив бошқарувини ривожлантириш бўйича ишлар амалга оширилаётгани таъкидланди. Бундаги асосий йўналишларидан бири - етакчи хорижий таълим муассасалари билан ҳамкорлик асосида бошқарув ходимларини тайёрлаш ва уларнинг касб даражасини ошириш, шунингдек акциядорлик жамиятларида раҳбарлик лавозимларига чет эллик юқори малакали менежерларни жалб қилишдир.
2015 йил 24 апрелда Ўзбекистон Республикаси Президентининг “Акциядорлик жамиятларида замонавий корпоратив бошқарув услубларини жорий этиш чора-тадбирлари тўғрисида”ги ПФ-4720-сонли қарори қабул қилинган. Унга мувофиқ, корпоратив бошқарув тизимини янада ривожлантиришнинг асосий йўналишларидан бири - етакчи хорижий таълим муассасалари билан ҳамкорлик асосида бошқарув ходимларини тайёрлаш ва уларнинг касб даражасини ошириш, шунингдек акциядорлик жамиятларида раҳбарлик лавозимларига чет эллик юқори малакали менежерларни жалб қилиш белгиланган.
Профессионал хорижий менежерларни жалб қилишдан олинадиган афзалликлар орасида уларнинг стратегиялар ишлаб чиқиш ва маълум мақсадлар эришишда кучли тажрибага эга эканлигини айтиб ўтиш мумкин. Бир сўз билан айтганда, улар компаниялар учун глобал мақсадларни қўйган ҳолда, мақсадга етиш ишларига бошқа мутахассисларни ҳам жалб қила оладилар.
