Тошкентдаги “Тозалаш-Антитеррор” тадбири доирасида 254 киши текширилди

Тошкент. 13 декабр. ЎзТАГ – Жорий йилнинг 11 декабрь куни Тошкент шаҳар ИИББ ходимлари томонидан Миробод тумани ҳудудида ўтказилган “Тозалаш-Антитеррор” тадбири доирасида 254 киши текширилди, деб хабар беради Ўзбек телеграф агентлиги (ЎзТАГ).

“Республикамизнинг турли вилоятларидан келиб, муайян иш жойига эга бўлмаган, вақтинчалик рўйхатдан ўтмаган ҳамда хонадон эгаси билан ижара шартномаси расмийлаштирмай яшаб келаётган шахслар ва бошқа ҳуқуқбузарлар аниқланиб, уларнинг барчаси туман ИИБ текшириш учун олиб келинди”, - дейилади Тошкент ИИББ матбуот хизмати хабарида.

“123 нафар фуқаролар республикамизнинг бошқа вилоятларидан келиб, Тошкент шаҳрида доимий ёки вақтинчалик рўйхатдан ўтмасдан яшаб келаётганликлари аниқланиб, уларга нисбатан Ўзбекистон Республикаси МЖтКнинг 223-моддаси 1-қисмига асосан маъмурий баённомалар расмийлаштирилди. 11 нафар хонадон эгалари ўз хонадонларини Тошкент шаҳрида рўйхатдан ўтмаган шахсларга яшаш учун тақдим этганлиги аниқланиб, уларга нисбатан Ўзбекистон Республикаси МЖтКнинг 223-моддаси 2-қисмига асосан маъмурий баённомалар расмийлаштирилди. 8 нафар фоҳишалик билан шуғулланувчи аёллар аниқланиб, уларга нисбатан Ўзбекистон Республикаси МЖтКнинг 190-моддасига асосан маъмурий баённомалар расмийлаштирилди. 6 нафар дайдиликда гумон қилинган шахслар Тошкент шаҳар ИИББ Реабилитация марказига олиб борилди. Шунингдек, 4 нафар вояга етмаганлар бемақсад, ота-онасининг назоратисиз юрганлиги аниқланиб, Тошкент шаҳар ИИББ вояга етмаганларга ижтимоий-ҳуқуқий ёрдам кўрсатиш марказига жойлаштирилди”, - дейилади хабарда.

Сурат манбаи: https://total.kz/ru/news/proisshestviya/v_tashkente_zaderzhani_podozrevaemie_v_uchastii_v_hizbut_tahrir_date_2017_12_12_21_08_28