Тошкентдан учган биринчи рейс Тожикистон пойтахтига бориб қўнди

Тошкент. 11 апрел. ЎзТАГ – Тошкентдан учган биринчи рейс Тожикистон пойтахтига бориб қўнди, деб хабар беради сешанба куни Тожик телеграф агентлиги (ТожикТА).

“Ўзбекистон ҳаво йўллари” ўзбек авиакомпанияси “Тошкент-Душанбе” маршрути бўйича илк рейсни амалга оширди”, - деб хабар беришди Душанбе халқаро аэропортида.

Самолёт маҳаллий вақт билан 08:05да қўнди, унинг бортида 29 пассажир бор эди.

Тожикистон пойтахтига рейслар ҳафтасига икки маротаба – сешанба ва шанба  кунлари амалга оширилиши кутилмоқда.

Ўзбек авиакомпанияси Душанбега илк парвозни шу йил 4 апрелга режалаштирган эди. Аммо у амалга ошмади. Ўшанда Душанбе халқаро аэропорти рейсга етарлича йўловчи йиғилмагани сабабли у 11 апрелга кўчирилганини маълум қилган эди.

Кейинчалик Ўзбекистоннинг Душанбедаги элчиси Шоқосим Шоисломов икки мамлакат пойтахтлари ўртасидаги қатнов юқори даражадаги келишувдан кейин йўлга қўйилиши мумкинлигини баён қилган эди.

Бундан ҳам олдин “Сомон Эйр” тожик авиакомпанияси “Душанбе-Тошкент” йўналишида учишларнинг бошланиши хабар қилган, лекин 20 февралга мўлжалланган рейс Тошкент техник сабабларга кўра тожик рейсини қабул қилмагани туфайли амалга ошмаган эди.

Ҳозирга қадар тожик авиакомпанияси “Душанбе-Тошкент” йўналишида парвозларни қачон бошлаши аниқ маълум эмас.