Тошкентга келган эронлик делегациялар йўл қурилиши ва қишлоқ хўжалигининг ривожини муҳокама қилади
Тошкент. 31 май. ЎзТАГ – Тошкентга келган эронлик делегациялар йўл қурилиши ва қишлоқ хўжалигининг ривожини муҳокама қилади, деб хабар беради Ўзбек телеграф агентлиги (ЎзТАГ).
Хусусан, 30-май куни Ўзбекистонга Эрон Ислом Республикасининг Йўллар ва шаҳарсозлик вазири Аббос Охундий бошчилигидаги делегация келди.
“Ташриф дастуридан Ҳукуматда, ташқи савдо, қурилиш вазирликлари, “Ўзавтотранс” агентлиги, “Ўзбекистон темир йўллари” АЖ раҳбарлари билан учрашув ва музокаралар ўтказиш ўрин олган. Делегация Самарқанд ва Бухорода ҳам бўлади”, - дейилади Ўзбекистон ташқи ишлар вазирлиги матбуот хизматининг хабарида.
Шу куннинг ўзида Тошкентга Эрон Ислом Республикасининг Қишлоқ хўжалиги вазири ўринбосари Али Акбар Меҳрфард бошчилигидаги делегация ҳам келди.
“Эрон делегацияси агросаноат комплекси учун замонавий асбоб-ускуналар ва технологияларнинг “Uzbekistan Agrotech Expo – 2018” халқаро ихтисослаштирилган кўргазма-савдоси ҳамда қишлоқ хўжалиги техникаси ва машиналарининг “Uzbekistan Agromash Expo – 2018” халқаро ихтисослаштирилган кўргазмасида иштирок этади, Қишлоқ хўжалиги вазирлиги, Ўзбекистон Савдо-саноат палатасида учрашув ва музокаралар ўтказади, Ўзбекистон қишлоқ хўжалиги илмий-ишлаб чиқариш маркази, Тошкент вилоятидаги қатор хўжаликларда бўлади”, - деб хулоса қилинади хабарда.
Сурат манбаи: http://www.tehrantimes.com/news/417759/TPO-hosts-Iran-Uzbekistan-business-forum-in-Tehran
