Тошкентнинг “Бунёдкор”и Осиё чемпионлар лигаси плей-офф босқичига чиқди

Тошкент. 24 апрель. ЎзТАГ – Тошкентнинг ”Бунёдкор” клуби Дохада маҳаллий “Ал-Жаиш” жамоасини 2:1 ҳисобига енгди ва Осиё чемпионлар лигасининг плей-офф босқичига чиқди, дея хабар беради Ўзбек телеграф агентлиги (ЎзТАГ).
“Биз тез гол киритдик, бу эса мезбонлар хужумкорлигини кучайтирди. “Ал-Жаиш” ҳисобни тенглаштирганда эса улар орқага чекиниб, дурангга ўйнай бошлашди. Бу албатта жазосиз қолмади. Ғалабадан хурсандман. Ўйлашимча, “Ал-Жаиш”га Осиё чемпионлар лигасидаги тажриба етишмади. Бизга эса, аксинча бу жиҳат қўл келди. “Бунёдкор”нинг ОЧЛда ёқимли анъанасини давом эттирганимиздан бахтиёрмиз. Бизда иштиёқ кучли бўлди. Ишонч ҳам. Ўйиндан олдин футболчилар билан суҳбатлашганимизда биз нафақат “Бунёдкор” учун, балки бутун бошли Ўзбекистон футболи шаъни учун курашишга келишиб олгандик. Агарда ғалаба қозона олсак, бу юртимизнинг Осиё майдонларидаги юзи эканлигини жуда яхши ҳис этдик. Келаси йилги Осиё чемпионлар лигаси квотаси учун ҳам ҳаракат қилдик” – деб таъкидлади “Бунёдкор” бош тренери вазифасини бажарувчи Александр Волков.
ОЧЛ 1/8 финалида пойтахт клуби Саудия Арабистонининг “Ал-Хилол” жамоаси билан ўйнайди.