Тошкентнинг “Пахтакор” жамоаси БААнинг “Ал-Айн” клубидан мағлубиятга учради

Тошкент. 19 март. ЎзТАГ – Тошкентнинг “Пахтакор” жамоаси Осиё чемпионлар лигасининг учинчи тури доирасида БААнинг “Ал-Айн” клубидан 0:1 ҳисобида мағлубиятга учради, дея хабар беради Ўзбек телеграф агентлиги (ЎзТАГ).

“Ўйиндаги ягона гол 60-дақиқада меҳмонларнинг легионери Мирослав Стох томонидан киритилди. Шундай қилиб, “Пахтакор” Осиё чемпионлар лигасида биринчи марта ютқазиб қўйди ва рақибини турнир жадвалининг биринчи ўринига ўтказиб юборди”, – деб таъкидлашди “Пахтакор” ФК матбуот хизматида.

“Бу жуда қийин ўйин бўлди. Гуруҳдаги барча жамоаларда кейинги босқичга чиқиш имконияти мавжуд. Афсуски, ғалаба қозона олмадик ва мағлуб бўлдик. Бунинг учун мухлислардан узр сўрайман. Ўйиндан келиб чиқиб шуни айтиш мумкинки, бугун мағлубиятга лойиқ эмасдик. Лекин яратилган вазиятларни голга айлантира олмадик. Бу борада ҳали кўп ишларни олиб боришимиз лозим. Ҳимоячиларимиз яхши ўйин кўрсата олмадилар. Учрашув сўнгида Егор Кримец ўзини алмаштириш кераклигини сўради. Унда кичик жароҳат бор эди. Лекин заҳирамиз қолмагани сабабли охиригача ўйнашини сўрадик. Тиббий ходимларимиз унинг жароҳати қанчалик хавфли эканлигини аниқлаши зарур. Кўринишидан, пайлари чўзилган бўлиши керак. Чемпионатнинг кейинги турини ўтказиб юборишимиз мумкин. Бу жамоага фойда беради, деб ўйлайман”, – деб таъкидлади “Пахтакор” бош мураббийи Самвел Бабаян.