Транспортчилар коррупцияга қарши туриш масаласини муҳокама қилдилар

Тошкент. 28 апрел. ЎзТАГ – Ўзбекистон автомобил ва дарё транспорти агентлигида “Коррупцияга қарши кураш – давр талаби” мавзусига бағишланган тадбир бўлиб ўтди, деб хабар беради Ўзбек телеграф агентлиги (ЎзТАГ).

Агентликдан маълум қилишларича, тадбир доирасида. “Маънавият тарғибот маркази”нинг ҳуқуқий тарғиботлар бўйича катта инспектори Муҳаммадали Эшназаровнинг маърузаси тингланди.

Унда таъкидланишича, мустақиллик йилларида мамлакатда коррупцияга қарши туриш бўйича қатор тадбирлар самарали амалга оширилмоқда. Юридик тилда “коррупция – мансабдор шаҳслар томонидан уларга берилган ҳуқуқлар ва ҳокимият имкониятларидан шахсий бойлик ортириш учун фойдаланишда ифодалувчи сиёсат ёки давлат бошқаруви соҳасидаги жиноий фаолият” демакдир.

Ўзбекистон коррупцияга қарши туриш бўйича қатор халқаро қонун хужжатларини  ратификация қилган ва мамлакатда ушбу иллатга қарши кураш бўйича миллий қонунчилик тизими яратилган. Хусусан, 1997 йилда қабул қилинган Ўзбекистон Республикаси миллий хавфсизлик концепциясида коррупция мамлакат хавфсизлигига хавф туғдирувчи таҳдидлардан бири деб тан олинган.

Ўзбекистоннинг 2008 йилда БМТ Коррупцияга қарши конвенциясига, 2010 йилда ИҲТнинг коррупция билан курашиш бўйича режасига  қўшилиши ҳам бу борада муҳим босқич бўлди.

Ушбу хужжатларга мувофиқ, “Жамиятда ҳуқуқий маданиятни ривожлантириш миллий дастури” қабул қилиниб, жорий этилган.