Туркия президенти Ўзбекистонга келди
Тошкент. 18 ноябр. ЎзТАГ – Кеча кечаси Туркия Республикаси Президенти Режеп Таййип Эрдўғон Ўзбекистонга иш ташриф буюрди, деб хабар беради Ўзбек телеграф агентлиги (ЎзТАГ).
Самарқанд халқаро аэропортида олий мартабали меҳмонни Ўзбекистон Республикаси Бош вазирининг ўринбосари А.Икромов кутиб олди.
“Ташрифнинг асосий тадбирлари 18 ноябрга мўлжалланган. Туркия Республикаси Президенти Ўзбекистон Республикасининг Биринчи Президенти Ислом Каримов қабрини зиёрат қилади”, – деб таъкидланади Ўзбекистон президенти матбуот хизмати хабарида.
Ўзбекистон Республикаси Президенти вазифасини бажарувчи Шавкат Мирзиёев ва Туркия Республикаси Президенти Режеп Таййип Эрдўғон учрашуви чоғида Ўзбекистон – Туркия ҳамкорлигининг бугунги ҳолати ва уни янада ривожлантириш истиқболлари муҳокама қилинади, томонларни қизиқтирган долзарб минтақавий ва халқаро масалалар юзасидан фикр алмашилади.
