Туркманистон президенти Мирзиёевни “Аваза” туристик ҳудудига таклиф қилди
Тошкент. 2 май. ЎзТАГ – Туркманистон президенти Гурбангули Бердимуҳамедов яқинда бўлиб ўтган телефон мулоқотида Ўзбекистон президенти Шавкат Мирзиёевни “Аваза” туристик ҳудудига таклиф қилди, деб хабар беради Ўзбек телеграф агентлиги (ЎзТАГ) Туркманистон раҳбарининг матбуот хизматига асосланган ҳолда.
“Бердимуҳамедов Ўзбекистон раҳбарини Аваза” Миллий туристик ҳудудига ташриф буюриб, денгиз курортининг имкониятларига шахсан баҳо беришни таклиф қилди”, - дейилади хабарда.
Шунингдек, қўшни давлат раҳбари Ўзбекистон президентини Балкан вилоятининг ривожланиши билан танишишга таклиф қилди. Бу ерда ҳозирда вилоятнинг бой табиий бойликларини ўзлаштириш, йирик денгиз портини қуриш ишлари давом эттирилмоқда.
Ўз навбатида, Мирзиёев Бердимуҳамедовнинг Туркманистонга ташриф ҳақидаги таклифини қабул қилди. Ташриф муддатлари дипломатик каналлар бўйича келишилади, дейилади хабарда.
