“Туронбанк” ўзбек банки касб ҳунар коллежлари битирувчиларига 1,3 млрд сўм ажратди

Тошкент. 8 апрел. ЎзТАГ – 2016 йилнинг биринчи чорагида “Туронбанк” акционерлик тижорат банки касб ҳунар коллежлари битирувчиларининг тадбиркорлик фаолиятини қўллаб-қувватлашга 1,3 млрд сўм кредитлар ажратди, деб хабар беради Ўзбек телеграф агентлиги (ЎзТАГ).

Банкдан хабар беришларича, февралда “Тижорат банклари томонидан касб ҳунар коллежлари битирувчиларига микрокредитлар ажратиш тартиби тўғрисида”ги низом қабул қилинган бўлиб, у Марказий банк томонидан тасдиқланган.

Низом томонидан касб ҳунар коллежлари битирувчиларининг бизнес лойиҳаларини молиялаштиришга имтиёзли микрокредитлар беришнинг ягона тартиби белгиланган.

Хужжатга мувофиқ, миллий валютадаги микрокредитлар якка тадбиркор сифатида рўйхатдан ўтган ёки юридик шахс низом жамғармасида 50% ёки кўпроқ акцияларга (улуш) эга бўлган битирувчиларга ўқув юртини битирганидан уч йилдан ортиқ вақт ўтмаган тақдирда ажратилади.

Микрокредитлар бериш қайтариш муддатини чўзмаслик шарти билан амалга оширилади. Якка тадбиркор сифатида юридик шахс ташкил этмасдан рўйхатдан ўтган касб ҳунар коллежлари битирувчиларига кредитлар энг кам иш ҳақининг 200 бараваридан кўп бўлмаган миқдорда, юридик шахс ташкил қилинган ҳолда энг кам иш ҳақи миқдорининг 300 бараваридан кўп бўлмаган миқдорда ажратилади.

Кредитдан фойдаланишда фоиз ставкаси миқдори Марказий банк қайта молиялаштириш ставкасидан юқори бўлмаган миқдорда белгиланади.