“Туронбанк” ўзбек банки ХТТБ кредит линиясини очди

Тошкент. 5 апрел. ЎзТАГ –“Туронбанк” Акционерлик-тижорат банк (АТБ) 2016 йилдан бошлаб Халқаро Тикланиш ва тараққиёт банки (ХТТБ) линияси бўйича кредитлар (лизинг) ажратиш имкниятига эга бўлди, деб хабар беради Ўзбек телеграф агентлиги (ЎзТАГ).

Банкдан маълум қилишларича, янги кредит линияси қишлоқ хўжалиги корхоналари, фермер ва дехқон хўжаликлари, кичик бизнес субъектларига мўлжалланган. У “Ўзбекистон Республикасида қишлоқ хўжалик тармоғини ривожлантириш” дастури доирасида очилган.

Кредит линиясидан кўзланган мақсад мамлакат ҳудудларида мева сабзавот тармоғини ривожлантиришдан иборат. Унинг доирасида қишлоқ хўжалиги маҳсулотларини етиштириш, сақлаш ва қадоқлашга инвестициялар, қишлоқ хўжалиги техникаси ва ускуналарини сотиб олиш каби йўналишлар ҳам молиялаштирилади.

Инвестиция лойиҳасини молиялаштириш суммаси $2 млнгачани, айланма капитали учун маблағ олиш миқдори $200 минггача (ёки унинг миллий валютадаги муқобили) ташкил қилади.

Инвестиция лойиҳасини молиялаштиришга кредитлар 10 йил муддатга асосий қарзни узиш бўйича 3 йиллик имтиёзли муддат билан берилади. Айланма капиталини тўлдиришга 1,5 йилга 9 ойлик имтиёзли муддат билан АҚШ долларларида йиллик 6% ва миллий валютада 9% ставкада берилади.

Молиялаштиришнинг асосий шартларидан бири қарз олувчида лойиҳанинг камида 20% миқдорида ўз маблағига эга бўлиши ҳисобланади.