“Уимблдон-2015” якунлари кутилагани каби бўлди

Тошкент. 13 июл. ЎзТАГ – “Катта дубулға” сериясининг учинчи турнири бўлган Уимлдонда аёллар ўртасида Серена Уильямс, эркаклар орасида Новак Жокович ғалаба қилди, деб хабар беради Ўзбек телеграф агентлиги (ЎзТАГ).

Қайд этиш зарурки, аёллар мусобақасида биз қилган тахмин тўғри чиқди. Бу ерда яримфинал жуфтликларида америкалик Серена Уильямс россиялик Мария Шараповани енгган бўлса, испаниялик Гарбинье Мугуруса польшалик Агнешка Радваньскаяни мағлуб этди.

Шундан кейин эркаклар яримфиналида швейцар Рожер Федерер ва серб Новак Жоковичларнинг ғалаба қилишини тахмин қилган эдик.

Ва ниҳоят, аёллар ўртасида “Уимблдон-2015” ғолибаси америкалик теннисчи қиз бўлишини башорат қилган эдик.

Серена осонлик билан ғалаба қилди. Вақти-вақти билан Гарбиньеда ҳам имкониятлар бўлиб турди. Аммо жаҳоннинг биринчи ракеткасини енгиш учун бунинг ўзи етарли эмас...Тан олиш керакки, Серенани енгиш учун энг кўп имконият белорусиялик Виктория Азаренкода мавжуд эди.

Шуни айтиб ўтишим мумкинки, ўтган шанба кунги аёллар финалида эртанги эркаклар баҳсида Федерерга ишқибозлик қилишимни, лекин Жокович енгишини сезган эдим. “Ролан Гаррос” турнирини швейцар Стэн Вавринка ютган бўлсада, жаҳоннинг биринчи ракеткаси бунга иккинчи марта йўл қўймаслигига кўзим етган эди.

Тахмин қилганимдай, Жокович енгди. Новак жорий йилдаги Уимблдонни, - ташқаридан қараганда, - катта  қийинчилик билан, лекин аслида катта заҳира билан ютиб олди. Рожерга эса барқарорлик етишмади. 

Агар Серена Уильямс АҚШ очиқ чемпионатини ютиб олса, “Катта дубулға” серияси барча мусобақаларининг ғолибига айланиши тайин.