Уинстон-Сэйлем турнирининг иккинчи доирасида Денис Истоминни жиддий синов кутмоқда
Тошкент. 25 август. ЎзТАГ – Уинстон-Сэйлем турнирининг иккинчи доирасида Ўзбекистоннинг биринчи ракеткаси Денис Истоминни жиддий синов кутмоқда. Ушбу турда у француз Жо-Вильфрид Тсонга билан беллашади, деб хабар беради Ўзбек телеграф агентлиги (ЎзТАГ).
Куни-кеча тунда ўзбек спортчиси америкалик Дональд Янгни 6:3, 6:3 ҳисобларида енгди. Бироқ, турнир жадвали ўзгариб, энди Денис Федерико Дель Бонис-Симоне Болелли жуфтлиги ғолиби билан эмас, балки француз билан тушади.
Ўз навбатида, жаҳоннинг 19- ракеткаси Жо-Вильфрид Тсонга мусобақани иккинчи доирадан бошламоқда.
Истомин ҳозирда жаҳоннинг 69-ракеткасидир.
Айтиб ўтиш зарурки, агар рейтингдан келиб чиқилса, жадвалнинг Денис ўйнаётган қисмида француз энг асосий тўсиқ ҳисобланади. Агар Истомин Жо-Вильфрид Тсонгани енгса, 1/2 финалда у бошқа бир француз – жаҳоннинг 11-ракеткаси Жиль Симон билан қарши келиши мумкин. Бунинг учун Симон ҳам кейинги доирага ўтиши керак.
Эслатиб ўтамизки, Уинстон-Сейлем Очиқ чемпионати АҚШдаги шу номли шаҳардаги қаттиқ кортларда ўтказиладиган эркаклар халқаро профессионал теннис турниридир. У АҚШдаги Уэйк-Форест университетида ёз ойларида бўлиб ўтади. Соврин жамғармаси $598 минг бўлган мусобақа 2011 йилдан бери ATP 250 сериясига киради. Турнир яккаликда беллашувчи 48 спортчига мўлжалланган.
Мусобақанинг яккалик соврини US Open Series ҳисобига кириб, АҚШ Очиқ чемпионати турнирлари сериясини якунлайди.
