Ҳукумат кореянинг Инха университети жойлашадиган ерни белгилади

Тошкент. 7 апрель. ЎзТАГ – Ўзбекистон ҳукумати Тошкентда ташкил этилаётган Жанубий Кореянинг Инха университетига Ўз.Р Фанлар Академиясига қарашли Алишер Навоий номидаги Тил ва адабиёт институти, Тарих институти ва “Фан” нашриёти биноларини сотишни топширди, дея хабар беради Ўзбек телеграф агентлиги (ЎзТАГ).
“Бинолар бозор баҳосида нархлангандан кейин Инха университетига сотилади. Бундан тушган маблағ Фанлар академияси Фундаментал кутубхонасини модернизация қилиш, унинг илмий муассалари, илмий ва моддий-техник базасини яхшилаш, янги юқори технологик илмий ускуналар сотиб олишга йўналтирилади”, - дея қайд этди Олий ва ўрта махсус таълим вазирлигидаги манба.
Инха университети асосий биносининг дизайни ушбу ой охирида тасдиқланади ва шундан кейин бош пудратчи – Ўзбекистон Президенти девони Ишлар бошқармасининг қурилиш бирлашмаси бинолар мажмуини лойиҳалаш, реконструкция қилиш ва қуришга киришади.