UMS компанияси Ўзбекистон пойтахтида Dual Carrier HSPA+ технологиясини жорий қилди
Тошкент. 22 июл. ЎзТАГ – Universal Mobile Systems (UMS) мобиль оператори Тошкентдаги 3G-тармоқларида Dual Carrier HSPA+ технологиясини жорий қилди, деб хабар беради Ўзбек телеграф агентлиги (ЎзТАГ).
“Амалга оширилган ишлар маълумот жўнатишнинг энг катта тезлигини секундига 42 мегабитга етказиш имконини берди. Бундай натижага одатдагидек битта частота ўрнига иккита UMТS частотасидан бир йўла фойдаланиш орқали эришилади.Натижада таянч станциядан абонентнинг мобил телефонигача маълумот жўнатиш тезлиги икки баравар ортади. Ҳозирги вақтда HSPA+ технологияси билан бутун пойтахт қамраб олинган. UMS мобил оператори бундан буён ҳам қамров доирасини кенгайтириб бориш ниятида. Бу йил минтақаларни босқичма-босқич шу технологияга ўтказиш ишлари давом эттирилади”, –деб таъкидланади компания хабарида.
Эслатиб ўтамизки, Universal Mobile Systems оператори тармоғи 2014 йил 1 декабрдан ишга тушган. 2015 йилнинг I чораги якунлари бўйича компания 488 минг абонентга хизмат кўрсатган.
