UMS Ўзбекистонда ўз фаолиятини 2029 йилга қадар давом эттиради

Тошкент. 5 август. ЎзТАГ – Universal Mobile Systems (UMS) МЧЖ – россиянинг МТС компаниясининг шўъба корхонаси – Ўзбекистондаги ўз фаолиятини лицензияга мувофиқ 2029 йилга қадар давом эттиради, деб хабар беради Ўзбек телеграф агентлиги (ЎзТАГ).

“Компания мобил операторнинг барча хизмат ва сервисларини кўрсатмоқда, янги абонентларни улаш ва амалдаги мижозларга хизмат кўрсатиш ишларини амалга оширмоқда. Салмоқли салоҳиятга эга UMS узоқ муддатли ривожланиш режаларини барча йўналишлар бўйича татбиқ этишни давом эттиради ва ўз мижозларининг эҳтиёжларини қондиришга алоҳида эътибор қаратади, - дейилади UMS сайтига жойлаштирилган хабарда.

Бундан бир кун аввал россиянинг қатор ОАВларида август охиригача МТС компаниясининг UMS таъсисчилари таркибидан чиқиши мумкинлиги ҳақида хабар қилишган эди.

Маълумот ўрнида, Universal Mobile Systems 2014 йил 24 сентябрда россиянинг МТС (50,01%) ва Ўзбекистон Алоқа, ахборотлаштириш ва  телекоммуникация технологиялари давлат қўмитаси ҳузуридаги “Радиоалоқа, радиоузатув ва телевидение маркази” (49,99%) томонидан ташкил этилган. UMSнинг мобиль алоқа тармоғи 2014 йил 1 декабрда ишлай бошлаган эди.

2016 йил бошига келиб UMSнинг абонентлари сони 1,095 млн кишини ташкил қилган.