“Уруш” лақабли ўзбек боксчиси профессионал рингдаги 7-жангида ҳакамлар қарори билан ғалаба қилди
Тошкент. 10 октябр. ЎзТАГ – “Уруш” лақабли ўзбек боксчиси Санжар Раҳмонов (6-0-1, 3 КО) профессионал рингдаги 7-жангида америкалик Жонатан Дайнонга (5-1-0, 4 КО) қарши учрашувда ҳакамлар қарори билан ғалаба қилди, деб хабар беради Ўзбек телеграф агентлиги (ЎзТАГ).
Ушбу ғалаба 8 октябрда Лас-Вегасда (АҚШ) Sin City Showdown кичик Флойд Мейвезернинг бокс кечасида қўлга киритилди. 6 раунд якунларига кўра, ўзбек спортчиси шу вақтгача мағлубиятга учрамаган америкалик боксчидан кучли бўлиб чиқди.
Бугунги кунда Раҳмонов кичик Флойд Мейвезерга қарашли Mayweather Promotions промоутерлик компанияси жангчиси ҳисобланади ва таниқли америкалик мураббий Дьюи Купер қўл остида машғулот олиб бормоқда. Ушбу мураббий оғир вазнда WBA мақоми эгаси Бейбут Шуменов ва WBO версияси бўйича жаҳон чемпиони Жесси Варгаслар билан ҳамкорлик қилади.
Эслатиб ўтамизки, ҳаваскор боксда Санжар Ўзбекистонда хизмат кўрсатган мураббий Зиятдинбек Тойғонбоев қўл остида шуғулланган. 2009 йилда Осиё чемпиони ва 2013 йилда Ўзбекистон чемпиони бўлган.
