Вақт бўлганида клипни албатта Ўзбекистонда олган бўлардик - Обри Пауэлл

Тошкент. 13 ноябр. ЎзТАГ – Вақт бўлганида клипни албатта Ўзбекистонда олган бўлардик, деди афсонавий Pink Floyd гуруҳининг “Louder than Words” (“Сўзлардан баланд”) номли хайрлашув альбоми клипи режиссёри Обри Пауэлл, дея хабар беради Ўзбек телеграф агентлиги (ЎзТАГ).

Видеоклип Орол денгизи муаммоларига бағишланган.

Клип режиссери Обри Пауэлл (Aubrey Powell) “Газета.uz” нашрига берган эксклюзив интервьюсида уни Орол муаммосига бағишланган клип олишга нима ундагани ва нега клипни Ўзбекистонда олишнинг иложи бўлмагани ҳақида сўзлаб берди (суратга олиш ишлари Қозоғистонда амалга оширилган).

Британ режиссерининг сўзларига кўра, бошида клипни Ўзбекистонда суратга олиш режалаштирилган. “Биз Тошкентдан Нукусга учиб келиб, бу ердан Орол денгизига боришни кўзлаган эдик. Бунинг учун биз маҳаллий кинокомпания билан боғландик, лекин бу ширкатда бизларни у ерда ишлаш учун таклиф қилиш учун зарур лицензия йўқ экан. Қисқа муддат ичида ана шундай лицензияга эга компанияни топиш анча мушкул. Шу сабабли биз Лондондаги Ўзбекистон элчихонаси билан боғландик, лекин у ерда ҳам шундай деб жавоб беришди. Бизга суратга ошлишга рухсат олиш учун икки ҳафтадан уч ҳафтага қадар вақт зарур бўлишини айтишди”, – деб таъкидлади у.

“Биз кута олма эдик. Қиш яқинлашиб қолган, айниқса, шимолроқда жойлашган Қозоғистонда. Вақт чекланганлиги сабабли Ўзбекистонга ташриф буюриш режасидан вос кечишга тўғри келди. Агар вақтимиз бўлганидан бунга албатта эришган бўлар эдик”, – деб якун ясади ўз сўзларига Пауэлл.